# Vocdonik eta Gitcoin Passport-ek bat egin dute, Sybil erasoekiko erresistentea den bozketa eskaintzeko

Sybil erasoak, hau da, pertsona bakar batek hainbat kontu erabiltzea bozketen emaitzak manipulatzeko, **mehatxu larria** dira bozketa-sistemen osotasunerako.

**Web3 gobernantzaren testuinguruan**, hauteslearen identitatea anonimoa edo pseudonimoa denez, **are zailagoa da hautesle bakoitzaren atzean benetako pertsona bat dagoela ziurtatzea**. Baina [Gitcoin Passport](https://www.passport.xyz/) bezalako teknologiak baliatuta, Vocdoni bezalako boto-protokoloek **hautesle bakoitzaren gizatasun-maila** froga dezakete, iruzurrezko jarduerak saihestuz eta bozketa-prozesu bakoitzaren zilegitasuna indartuz.

Horregatik, pozarren iragartzen dugu **Gitcoin Passport integratu dugula** autentifikazio- eta errolda-sistema gisa, Web3ra bideratutako gure bozketa-aplikazioan: [Onvote.app](http://Onvote.app) (zaharkitua).

## Nola funtzionatzen du?

Gaurtik aurrera, [Onvote.app](http://Onvote.app)-eko (zaharkitua) bozketa-sortzaileek **errolda beren neurrira egokitu dezakete, nahi duten Gitcoin Passport puntuazioa zehaztuta** (1etik 100era), eta baita **beharrezko zigiluen (*stamps*)** irizpideak ezarri ere; horrela, doitasun handiz zehatz dezakete nork duen botoa emateko eskubidea. «OR» eta «AND» zigilu-aukera pertsonalizagarriekin, bozketa-sortzaileek erabaki dezakete parte-hartzaileek zehaztutako zigiluetako edozein behar duten («OR») ala guztiak behar dituzten («AND»), bozketa horretan parte hartu ahal izateko.

Adibidez, bozketa batek eska dezake hautesleek gutxienez 20 puntuko Gitcoin Passport puntuazioa izatea, eta, horrez gain, Holonym bezalako zerbitzu baten zigilua izatea ([pribatutasuna lehenesten duen identitate-sistema, ezagutza zeroko teknologian oinarritua](https://blog.vocdoni.io/vocdoni-partners-holonym)). Gainera, horri guztiari [**Vocdoniren zk-SNARK bidezko boto anonimoa**](https://blog.vocdoni.io/anonymous-voting-zksnarks) gehituz gero, gizatasun-frogaren (Proof of Humanity) eta anonimotasunaren arteko konbinazio ezin hobea lortuko duzu.

Hautesleentzat, berriz, ezin errazagoa da: **konektatu Gitcoin Passport puntuazioari lotutako diru-zorroa (*wallet*)**, eta dena prest dago bozketan parte hartzeko.

[Vocdonik eta Gitcoin Passport-ek bat egin dute, Sybil erasoekiko erresistentea den bozketa eskaintzeko](https://www.youtube.com/embed/3oSuTSmxU6U?start=1\&feature=oembed)

[Onvote.app](http://Onvote.app)-eko gainerako guztiak bere horretan jarraitzen du: **gasik gabeko bozketa, muturretik muturrerako egiaztagarritasuna** eta **malgutasun aparta**, bozketa-prozesu bakoitza edozein egoeraren behar zehatzetara egokitzeko; dela **anonimotasuna**, dela boto haztatua, dela emaitzak zifratuta gordetzea bozketa amaitu arte, eta beste hainbat aukera.

## Zer dator gero?

Integrazio honekin, bozketak antola ditzakezu Gitcoin Passport autentifikazio- eta errolda-sistema gisa erabilita. Baina **laster beste errolda mota batzuekin batera integratuko dugu, hala nola ERC20 tokenekin edo NFTekin**. Horrela, Gitcoin Passport segurtasun-geruza gehigarri gisa arituko da, bozketa guztiak Sybil erasoekiko erresistente mantenduz.

Gitcoin Passport-en integrazioarekin, Web3 gobernantza seguruago eta zilegiago baterako bidea urratzen ari gara. Probatu [onvote.app](http://onvote.app)-en (zaharkitua)!